ஸ்ரீ அரவிந்தரின் பூரண யோக விளக்கம் #01
ஸ்ரீ அரவிந்தர் மனித உணர்வின் அகங்காரத்தின் – ஆணவத்தின் முட்டாள்தனத்தால் நாம் ஒவ்வொரு காரியத்தையும் செய்து இறுதியில் ஏன் தோல்வி அடைகிறோம் என்பதை இப்படிக் குறிப்பிடுகிறார்.
வாழ்க்கையின் பாடத்திலிருந்து ஒருவன் தெரிந்துகொள்ள வேண்டியது யாதெனில் இந்த பௌதீக உலகத்தின் ஒவ்வொன்றும் மனிதனை இறுதியில் தோற்கச் செய்கிறது. உண்மையில் தன்னை நோக்கி முழுமையாகத் திரும்பிய ஒருவனை இறைவன் ஒருபோதும் தோல்வியடையச் செய்வதில்லை, இதை உங்களிடம் தவறு இருப்பதால் ஏதோ உங்களை ஊதித் தள்ளிவிடுகிறது என்று நினைக்காதீர்கள்; உலகில் எந்த மனிதனும் நிலைத்து நிற்க முடியாது; அவன் வைக்கும் ஆசைகள் எதுவும் நீடித்து நிலைத்து நின்று பயன் தர முடியாது; அப்படி எதை அடைந்தாலும் அது கடைசியில் ஒரு தோல்வியை, விரக்தியைத் தான் தரும்; எவரும் வாழ்க்கையில் திருப்தியுற முடியாது!
ஆகவே எமது மனம், உடல், பிராணன் முதலிய கருவிகளை இறைவனை நோக்கித் திருப்புவது மாத்திரமே நாம் வாழ்க்கையில் செய்யக்கூடிய ஒரேயொரு உண்மையாகும்.
மனிதன் தான் விரும்பி அடையும் அனைத்தும் இறுதியில் தான் விரும்பியது போன்று இருப்பதில்லை என்பதால் எப்போதும் திருப்தி அடைவதில்லை! இதனால் வேறு ஒன்றை முயற்சித்துப் பார்க்கலாம் என்று நினைக்கிறார்.
அழகான பெண்ணைத் திருமணம் செய்தால் மகிழ்ச்சியடையலாம் என்று நம்பி கஷ்டப்பட்டு திருமணம் செய்கிறான்; செய்த பிறகு அது உண்மையல்ல என்று மனம் வெதும்புகிறான்; பெரிய தொழிலில் நல்ல சம்பளம் என்று வேலைக்குச் சென்று பிறகு அது மன அழுத்தம் என்று புலம்புகிறான். இப்படி ஒவ்வொரு செயலும் இறுதியில் துன்பத்தைத் தருகிறது.
இதை வெல்வது எப்படி? இப்படி கற்பனையான ஆசைகளை வளர்த்துக்கொள்ளாமல், எமக்கு வாழ்க்கையில் அமையும் ஒவ்வொரு சந்தர்ப்பத்திலும் எமது ஆசைகள், பேராசைகளை முதன்மைப் படுத்தி ஏமாறாமல் அதை இறைவனுக்கு அர்ப்பணமாகச் செய்கிறோம் என்ற கடமையுணர்வுடன் செய்யும் பண்பு எமக்கு மன அழுத்தம் இல்லாத வாழ்க்கையைத் தரும்
